No timbangen, nadagdagsen kadi dagiti “naiimbag” ngem dagiti “nadadakes” nga aramidmo?
Maysaka kadi a nasayaat nga tao segun iti pangrukod ti Dios? No kasta, umdas kadi ti “kinasayaatmo” tapno makaapanka sadiay Langit?
Ammoem ita babaen iti panangsungbatmo kadagitoy walo nga saludsod:
1. Napadasam kadin ti nagulbod? (Maibilang ti pannagananda nga puraw nga ulbod.) Wen no Haan
2. Nagtakawka kadin wenno nangala iti anyaman nga banag nga dim kukua? (Uray pay no kasano kabassit ti pategna, uray no kasanon kabayag.) Wen no Haan
3. Nasolisogka kadin gapu ta adda kinaderrep wenno nailubongan nga kalikagum iti panunotmo bayat iti panangmatmatmo iti maysa nga tao? Wen no Haan
4. Naiyebkasmon kadi dagitoy nga sarita: “Dios ko” wenno “Susmaryosep” iti pannakakigtotmo wenno kas panangipakita iti pungtot, unget wenno panagladingit? Wen no Haan
5. Mangmangtedka kadi iti kuartam wenno sanikuam a kas tulongmo kadagiti marigrigat? Wen no Haan
6. Dinominggoka kadi nga agsimsimba? Wen no Haan
7. Aramidmo kadi nga basaen ti Biblia iti inaldaw? Wen no Haan
8. Natungpalmo kadi ti umuna kadagiti Sangapulo nga Bilin ti Dios? (Ti umuna kadagiti Sangapulo nga Bilin ket: “Dika agdaydayaw iti sabali nga dios no di laeng siak.” – Exodo 20:3) Wen no Haan
Maiparit ti sumirip. Madim kitaen daytoy a paset agingga nga malpasmo nga sungbatan dagiti walo nga saludsod.
Sungbat kadagiti saludsod:
1. Segun iti pangrukod ti Apo Dios, maysaka nga ulbod nga tao uray no naminsanka laeng nga nagulbod. Idiay libro ti Paltiing 21:8, kinuna ni apostol Juan, “amin nga ulbod – agyandanto iti dan-aw ti gumilgil-ayab nga apuy ken asupre nga isu ti maikadua nga ipapatay.” (Maikasiyam nga Bilin)
2. Maysaka nga agtatakaw segun iti pangrukod ti Dios uray no naminsanka laeng nga nagtakaw iti uray anyaman a banag (haan nga maibilang ti kinadakkel, kinabassit wenno kinapateg ti banag nga tinakaw). Idiay 1 Taga-Corinto 6:10, nakasurat daytoy, “Awanto kadagiti agtatakaw ti makapagtagikua iti pagarian ti Dios.” (Maikawalo nga Bilin)
3. No naaramidmon nga matmatan iti maysa nga lalaki wenno babai nga adda laokna nga gartem, dayta ket maipada iti pannakikamalala. Imbaga ni Jesus, “Ti siasinoman a mangmatmat iti maysa a babai, ket gartemanna, iti pusona nakabasolen iti pannakikamalala.” (Mateo 5:28) Iti surat ni apostol Pablo, 1 Taga-Corinto 6:9-10, kinunana, “dagiti mannakikamalala, dagiti aggartem iti padada a lalaki wenno padada a babai… awanto kadakuada ti makapagtagikua iti pagarian ti Dios.” (Maikapito nga Bilin)
4. Pananginsulto iti nasantoan nga nagan ti Dios ti pabarengbareng nga panangyebkasmo iti naganna tunggal a makigtotka wenno kas panangipakitam iti pungtotmo, ungetmo wenno panagladingitmo. Kinuna ti Dios idiay libro ti Levitico 24:16 nga, “siasinoman a mangilunod iti nagan ti DIOS… ket masapul a matay.” (Maikatlo nga Bilin)
5, 6, 7. Segun iti Biblia, “amin kadagiti kasayaatan nga aramidmo mayarigda laeng iti nakarugrugit a nisnis… (Isaias 64:6) Kayatna a sawen daytoy ket amin kadagiti maaw-awagan nga “naiimbag nga aramidmo” ket madidanto kaanoman nga mabalin nga ikkaten, abbongan wenno sukatan dagiti panaglaksidmo kadagiti Nasantoan nga Bilin ti Apo Dios.
Panunutem daytoy, no kadi iti maysa nga tao ket nakaaramid iti nakaro unay nga panaglabsing… kas pangarigan, pammapatay… ngem kalpasanna daytoy ket nangited met isuna iti dakkel a gatad ti kuarta para kadagiti managrigrigat, umdas kadin dayta tapno basta laengen nga lipatan ti linteg ti pammapatay na? Haan! Masapolna latta nga pagdusaan iti basolna. Kasta met dagiti basbasolmo iti Dios, haanmo ipagarup nga mabalin dagitoy nga masukatan wenno madalusan iti “naiimbag nga aramidmo” a kas koma iti panangtulongmo kadagiti managrigrigat, dinominggom nga panagsimba wenno inaldaw nga panagbasa iti Biblia.
8. Ti umuna kadagiti Sangapulo nga Bilin ket: “Dika agdaydayaw iti sabali nga dios no di laeng siak.” Kayatna a sawen, masapul nga ayatem ti Dios iti aminmo nga puso, panunot, kararua ken bileg. Segun iti Biblia, awan siasinoman ti nakatungpal iti daytoy nga bilin (Dagiti Salmo 14:2-3) – no kunaem nga naaramidmo daytoy, nasalungasingmo pay ketdi iti maikasiyam nga bilin babaen iti panagulbodmo. (Umuna nga Bilin)
Ayos ka pay kadi gayyem?
Impakaammo kenka babaen daytoy naababa nga eksamen no kasano iti pudno nga kasasaadmo no inka sangoen ita ti Apo Diyos ket ukomennaka babaen iti lima laeng kadagiti Sangapulo nga Bilinna. No usaren ti Dios dagiti Bilinna a kas panangukom kenka, maibagam kadi nga awananka iti basol, wenno maysaka a managbasol? (Napaneknekanen nga maysaka nga managbasol kasla kadagiti amin nga tao. Uray pay nga no iti entero nga biagmo ket natungpalmo nga awan biddutna dagiti siyam kadagiti Sangapulo nga Bilin ti Dios, napaayka met iti Umuna nga Bilin – kitaem ti maikawalo kadagiti saludsod). No ngarud managbasolka, naikalintegan kadi nga gungunaannaka pay ti Dios babaen ti panangpastrekna kenka idiay Langit – iti nasantoan nga pagtaenganna – wenno rebbeng laeng a dusaennaka idiay Impiyerno a kas supapak iti pannakabasolmo? Ammotayo amin nga iti maysa a naimbag nga ukom ditoy daga ket ipadusana ti siasinoman nga manglabsing iti linteg. Madi kadi a kasta met ti namnamaentayo nga aramiden ti naimbag nga Apo Dios – ti nalinteg ken awan idumdumana nga Ukom ti Sangalubongan?
Madika koma nga maupay gayyem. Dawatenmi koma nga aganoska ket ituloymo nga basaen daytoy. Napudno unay ti paaymi nga maawatam ti kasasaadmo gapu iti napaypayso nga panangisakit mi iti kararuam.
Pakadanagam kadi iti pannakaammom nga magmagna kan ita iti nalawa nga dalan nga agturong idiay Impiyerno? Rebbeng laeng nga maboriborka ken mariribukanka! Kinuna ni Jesus nga ti Impiyerno ket nakabutbuteng unay nga pagyanan, nasaysayaat pay kano nga dukutem ti maysa kadagiti matam no babaen daytoy ket maisalakanka, ngem ti addaanka nga agpayso ti duwa nga mata ngem agtalinaedka met sadiay Impiyerno iti agnanayon gapu iti panagayatmo kadagiti basbasolmo (Marcos 9:43-48).
Ammom kadi ti naimbag unay nga inaramid ti Apo Dios para kenka tapno madimto a kasapulan nga agtaeng idiay Impiyerno iti agnanayon a kas dusam? Imbaonna ti kakaisuna nga Anakna, ni Jesus, tapno matay babaen iti krus – sakbay dayta, nagsagaba umuna isuna a kas dawdawaten iti kinalinteg. Ngem iti maikatlo nga aldaw, nagungar isuna manipud idiay tanem, ket pinarmekna iti patay a naminpinsan! Kastoy ti nakasurat iti Biblia, “Gapu iti kasta unay a panagayat ti Dios iti lubong, intedna ti kakaisuna nga Anakna tapno ti siasinoman a mamati kenkuana saan a matay no di ket agbiag nga agnanayon (Juan 3:16). Nilabsingmo dagiti Bilin ti Dios, binayadan ti awanan-basol nga ni Jesu-Cristo ti multam, kasta ti panagayat ti Dios kenka.
No agladingitka ken agbabawika kadagiti basbasolmo ken agtalekka iti ipapatay ni Jesus – ti kakaisuna nga mabalin nga pangbayad kadagiti panaglabsingmo, inkari ti Dios nga pakawanenna amin nga basbasolmo ken itedna kenka ti sagut iti biag nga awan patinggana. No agbabawika (kayatna a sawen, ipudnom ken ilaksidmon dagiti basbasolmo) ken mamatika ken ni Jesus ken ti inaramidna para kenka, madimto masapulen nga agsagaba idiay Impiyerno gapu ta amin nga basolmo ket binayadanen ni Jesus babaen iti ipapatay na iti krus. Ngem no ituraymo ken ipilitmo latta iti pammatim nga naimbagka nga tao ket gapu iti daytoy, maikari nga makaapanka idiay Langit, awanen iti namnama nga maisalakanka gapu ta immay ni Jesus ditoy daga tapno isalakanna dagiti managbasol, haan nga dagiti awanan-basolna.
No umannurotka mga maysaka nga managbasol ket kasapulam iti pammakawan ti Dios ngem madika sigurado no anya iti ikararagmo, mabalinmo nga usaren daytoy a kas pagtuladam:
“Apo Dios, agbabawiak ita kadagiti amin nga basbasolko kenka, a kas koma iti: (ibagam amin nga basbasolmo). Kaasiannak koma ken pakawanennak kadagitoy. Agtalekak ita ken ni Jesu-Cristo a kas Manangisalakanko ken Apo (babaen iti panangbigbigmo ken ni Jesus a kas Apo, kayatna a sawen nga isukomon ken ni Jesus ket isunan ti mangiturong iti biagmo). Itedmo koma kanyak ti biag nga agnanayon. Agyamanak unay iti naindaklan nga ayatmo, daytoy ti kararagko babaen iti nagan ni Jesus, amen.”
Inaldawmon nga basaen ti Biblia manipud ita ken tungpalem dagiti mabasam nga nakasurat ditoy. Dikanto baybay-an wenno panawan ti Apo Dios.
Anya pay ti ururayem gayyem?
p1lgr1m one's musings 